Mae Porthladd Rhydd Ynys Môn wedi croesawu cyhoeddiad Llywodraethau Cymru a’r DU am Grantiau Cyflymydd Safle, gyda chyllid wedi’i gadarnhau i gefnogi prosiectau yn y Porthladd Rhydd.

Cyhoeddodd Llywodraethau Cymru a’r DU gyllid o £162,000 i Borthladd Rhydd Ynys Môn ar gyfer:

• Asesiad Priffyrdd: mae angen asesiad o uwchraddio priffyrdd i fodloni gofynion cynllunio a datgloi safleoedd datblygu sy’n wag ers amser.
• Asesiad Capasiti Grid: astudiaeth grid gynhwysfawr ar draws sawl safle treth er mwyn cyflymu cysylltiadau a chefnogi integreiddio ynni adnewyddadwy.

Mae’r Grantiau Cyflymydd Safle yn darparu cyllid tymor byr wedi’i dargedu i safleoedd o fewn Parthau Strategaeth Diwydiannol, gan gynnwys Porthladd Rhydd Ynys Môn, gan helpu i fynd i’r afael â rhwystrau ymarferol a thechnegol sy’n oedi datblygiad. Bwriad y grantiau yw cyflymu’r cynnydd a darparu’r adnoddau sydd eu hangen ar bartneriaid lleol i symud safleoedd sydd â photensial uchel i’r cam cyflawni yn gynt.